
马尔巴大师教言集MARPA8ཏཻ་ལོ་པའི་རྣམ་པར་ཐར་པ།
1-1-53b
༄༅། །ཏཻ་ལོ་པའི་རྣམ་པར་ཐར་པ།
༄། །མི་རང་རྒྱུད་ཀྱིས་བསྡུས་པའི་ཡོན་ཏན་བསྟན་པ།
༈ སྐུ་འཁྲུངས་པ་ནས་མཁའ་འགྲོ་མ་ཟིལ་གྱིས་མནན་ཅིང་ཆོས་གསན་པའི་ཡོན་ཏན།
བླ་མ་དམ་པ་རིན་པོ་ཆེ་རྣམས་ལ་ཕྱག་འཚལ་ལོ། །རིན་ཆེན་བེ་དུ་རྱ་བཞིན་འགྲོ་བའི་དགོས་འདོད་རེ་སྐོང་ཞིང་། །ཐབས་དང་ཤེས་རབ་ཟུང་འཇུག་ཉི་ཟླ་ལྟར་གསལ་བདག་ཉིད་ཅན། །གསལ་འགྲིབ་དང་བྲལ་ནམ་མཁའ་ལྟ་བུར་ཀུན་ཁྱབ་སྙིང་རྗེ་ནི། །མ་བཞིན་རྩེ་(བརྩེ་)བས་བདེ་སྟོང་དབྱེར་མེད་བླ་མའི་ཞབས་ལ་འདུད། །གཉིས་དག་ལྔ་ལྡན་ཆོས་སྐུ་གཟུགས་སྐུ་གཉིས། །སྒྲིབ་མེད་སྒྲིབ་སྤངས་རང་བྱུང་ཡེ་ཤེས་ཏེ། །གསང་བ་གསུམ་ལྡན་འཁོར་ལོ་རྣམ་གསུམ་གྱི། །རྒྱུ་འབྲས་དབྱེར་མེད་གནས་ལུགས་རིམ་པ་བྲིས། །དེ་ལ་ཐོག་མར་བླ་མ་རིན་པོ་ཆེ་རྣམས་ཀྱི་བྱིན་བརླབས་(རླབས་)ཀྱི་ཆུ་རྒྱུན་མ་ཆད་པ། དཔལ་རྡོ་རྗེ་འཆང་ནས་སྒྲོན་མེ་ཅིག་(གཅིག་)ནས་ཅིག་དུ་(གཅིག་ཏུ་)མཆེད་པ་ལྟ་བུའི་ཉམས་ཀྱི་གདམས་ངག །མ་རིག་པའི་མུན་པ་སེལ་བར་བྱེད་པའི་བརྡའ་དོན་འགྲོལ་བར་མཛད་པའི་བླ་མ་རིན་པོ་ཆེ་བཀའ་དྲིན་ཅན་རྣམས་ཀྱི་རྣམ་པར་ཐར་པ་འདི་ལ་དོན་རྣམ་པ་ལྔ་སྟེ། དང་པོ་དཔལ་རྡོ་རྗེ་འཆང་གི་གནས་ལུགས་དང་དེས་གསུངས་པའི་ཆོས་དེ་དག་གང་ལ་གཏད་པ་དང་། དེས་སྣོད་ལྡན་རྗེས་སུ་གཟུང་བ་གང་ཡིན་པ་དང་། དེ་ལས་ཇི་ལྟར་བརྒྱུད་དེ་འོངས་པའི་རྣམ་པར་ཐར་པ་དང་། དེ་དག་གི་ཞལ་ལས་རྙེད་པའི་ཆོས་གང་ཡིན་པ་ངོས་བཟུང་བ་སྟེ། དེ་ལྟར་ལྔས་བླ་མ་སྤྲུལ་པའི་སྐུའི་འཁོར་ལོ་ལ་བརྟེན་ནས་བརྒྱུད་པའི་སྒྲོ་འདོགས་གཅོད་པའོ། །དེ་ལ་དང་པོ་ནི་དཔལ་བདེ་མཆོག་རྡོ་རྗེ་འཆང་དེ་ཤེས་བྱ་རང་སྣང་གི་དབང་དུ་བྱས་ནས། ཡུལ་ཆོས་ཀྱི་དབྱིངས་
1-1-54a
སྤྲོས་པ་ཐམས་ཅད་དང་བྲལ་བ་ལ། ཡུལ་ཅན་རིག་པའི་ཡེ་ཤེས་ལྔ་དབྱེར་མེད་བདེ་བ་ཆེན་པོའི་ངང་དུ་སྡོམ་པ་སྟེ། སྐུ་གསུམ་དབྱེར་མི་ཕྱེད་པ་ལས་གདུལ་བྱའི་སྣང་ངོར་ཟག་པ་མེད་པའི་ཡེ་ཤེས་ཀྱི་སྐུ་ལོངས་སྤྱོད་རྫོགས་པར་གཞེངས་(བཞེངས་)ཏེ། འཁོར་འདས་ཐམས་ཅད་དབྱེར་མེད་ལྷན་ཅིག་སྐྱེས་པའི་ཡེ་ཤེས་བདེ་བ་ཆེན་པོའི་ངང་དུ་སངས་རྒྱས་པའོ། །གཉིས་པ་དེས་གསུངས་པའི་ཆོས་ནི། འོག་མིན་བདེ་བ་ཆེན་པོའི་ཕོ་བྲང་དུ། གསང་བ་བླ་ན་མེད་པའི་ཆོས་ཐམས་ཅད་འཁོར་དག་པ་བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ལ་གསུངས་པ། དེ་ཡང་གསང་བ་བླ་ན་མེད་པའི་ཆོས་ལྐོག་གྱུར་དུ་གསུངས་པ་ནི། བྱང་ཆུབ་སེམས་དཔའ་རྡོ་རྗེ་སྙིང་པོ་ལ་སོགས་པས་བསྡུས་ཏེ། པོ་ཏི་གླེགས་བམ་དང་སྐུ་གསུང་ཐུགས་གསང་བ་མཛོད་ཀྱི་བརྡའ་རྣམས་སུ་བསྡུས་ཏེ་གནས་པའོ། །གཏད་པ་བསྟན་པ་ནི། སངས་རྒྱས་ཐམས་ཅད་ཀྱི་ངོ་བོ་དཔལ་འཁོར་ལོ་སྡོམ་པས་གསུངས་པ། ང་ནི་རང་བྱུང་སངས་རྒྱས་ཏེ། །ཆོས་ཀྱང་རང་འབྱུང་ཉིད་ཡིན་པས། །འཆད་པ་པོ་ང་ཆོས་ཀྱང་ང་། །ཞུ་བ་པོ་ཡང་ང་ཉིད་ཡིན། །འཁོར་གྱི་ཚོགས་མང་ཉན་པ་ང་། །འཇིག་རྟེན་འཇིག་རྟེན་འདས་པ་ང་། །འཇིག་རྟེན་འདས་པ་སྒྲུབ་བྱེད་ང་། །ངའི་རང་བཞིན་ལྷན་ཅིག་སྐྱེས། །ཅེས་(ཞེས་)གསུངས་ཏེ། གསང་སྔགས་སྙིང་པོ་དོན་གྱི་མཆོག །སངས་རྒྱས་ཀུན་གྱི་གསང་ཆེན་ནི། །རང་བྱུང་བརྡའ་ཡིས་བསྡུས་པ་དག །མཁའ་འགྲོ་མ་ལ་གཏད་ཀྱིས་སྦོས། །མན་ངག་སྙིང་པོའི་དོན་བསྡུས་པ། །གཏད་ཀྱི་གསང་བའི་རྒྱས་བཏབ་པོ། །གསུང་ནས་ཡེ་ཤེས་དང་འཇིག་རྟེན་གྱི་མཁའ་འགྲོ་མ་ལ་གཏད་པའོ། །དེ་ཡང་མཁའ་འགྲོ་མ་དེ་དག་གི་བཞུགས་ཚུལ་ནི། སྤྱིར་འཛམ་བུའི་གླིང་ལ་གླིང་ཆེན་པོ་དགུ། གླིང་ཕྲན་
1-1-54b
གྲངས་མེད་པ་ཡོད་དེ། རྒྱ་གར་གྱི་ཡུལ་ལ་དབུས་མ་ག་ཏ་རྡོ་རྗེའི་གདན། དེའི་ཤར་ཕྱོགས་ན་བྷྃ་ག་ལ། བྱང་ཕྱོགས་ཁ་ཆེ། ནུབ་ཨུ་བརྒྱན(རྒྱན)། ལྷོ་ཀོ་ས་ལ། མཚམས་བཞི་ན་བྱང་ཤར་ན་ཀ་མ་རུ་པ། ཤར་ལྷོ་ན་ཟ་ཧོར། ལྷོ་ནུབ་སིན་དྷུ། ནུབ་བྱང་དྷི་ཝི་ཀོ་ཊིའོ། །དེ་ལྟ་བུའི་ཁྱད་པར་འཕགས་པ། ནུབ་ཕྱོགས་དབུ་བརྒྱན་(རྒྱན་)ནི་རང་བཞིན་གྱིས་གྲུབ་པའི་དུར་ཁྲོད་བརྒྱད་ཀྱིས་ཡོངས་སུ་བསྐོར་བ། གྲུབ་པའི་གནས་ཐུན་མོང་མ་ཡིན་པ། དེ་ན་དཔལ་ཧེ་རུ་ཀ་རང་བྱུང་གི་ལྷ་ཁང་ཞེས་ཀྱང་བྱ། ཨུ་བརྒྱན་(རྒྱན་)གྷན་དྷོ་ལཱི་གཙུག་ལག་ཁང་ཞེས་ཀྱང་བྱ་བ་ན། དུག་མཚོའི་འོབས་དང་། ལྕགས་རི་དང་སྲོག་ཆགས་གདུག་པ་ཅན་མང་པོས་བསྐོར་བ། སྒོ་རིམ་པ་གསུམ། འཁོར་ས་རིམ་པ་གསུམ་དང་བཅས་པ་ན་སྒོ་བཞི་རྟ་བབས་དང་བཅས་པ་ཡོད་པའོ། །དེའི་དབུས་དྷརྨ་གྷར་ཛ་ཆོས་ཀྱི་མཛོད་བཞུགས་པ་ལ། མཁའ་འགྲོ་མ་རྣམ་པ་གསུམ་བཞུགས་པ་ལས། ཕྱི་སྤྲུལ་སྐུ་ཟ་བྱེད་ལས་ཀྱི་མཁའ་འགྲོ་མ་ནི། འབངས་སྒོ་མའི་ཚུལ་དུ་བཞུགས་ནས་སྣོད་མིན་ཐམས་ཅད་ཚར་གཅོད་པའི་བྱ་བ་བྱེད་དོ། །ནང་ལོངས་སྐུ་འཇིག་རྟེན་ལས་ཀྱི་མཁའ་འགྲོ་མ་ནི། རྒྱུད་ཐམས་ཅད་ཀྱི་བདག་མོ་མཛད་ཅིང་མཆོད་པ་ལ་བརྩོན་པར་བཞུགས་སྷོ། །གསང་བ་ཆོས་སྐུ་དྲི་མེད་ཡེ་ཤེས་མཁའ་འགྲོ་ནི། གཞལ་ཡས་ཁང་གི་དབུས་ན་བཞུགས་པ་མེད་པའི་ཚུལ་གྱིས་གཉིས་སུ་མེད་པའི་ཡེ་ཤེས་བདེ་བ་ཆེན་པོའི་ངོ་བོར་བཞུགས་སོ། །དེ་ཡང་དཔལ་འཁོར་ལོ་སྡོམ་པའི་རྒྱུད་ཐམས་ཅད་ཡིད་བཞིན་ནོར་བུ་རྣམ་གསུམ་གྱི་ངོ་བོར་ནི་བཞུགས། དེ་ཡང་རང་བྱུང་སྐུའི་གསང་མཛོད་དང་། ཡིག་འབྲུ་གསུང་དང་། ཕྱག་མཚན་ཐུགས་ཀྱི་གསང་མཛོད་གསུམ་སྟེ། དེ་ལ་མི་ཕྱེད་པའི་ལྕགས་གསུམ་བཅུག་པ་བརྒྱ་རིམ་པ་བདུན་དང་བཅས་པ་བཞུགས་སོ། །
1-1-55a
དེ་ཡང་བཅོམ་ལྡན་འདས་དཔལ་རྡོ་རྗེ་རྣལ་འབྱོར་མ་དེ་ཉིད་དཀྱིལ་འཁོར་གྱི་འཁོར་ལོའི་ཚུལ་དུ་བཞུགས་སྟེ(ཏེ)། རྣལ་འབྱོར་མ་སུམ་བཅུ་(ཅུ་)རྩ་བདུན་དེ་དག་རེ་རེ་ལ་ཡང་འཁོར་མཁའ་འགྲོ་མ་བྱེ་བ་བྱེ་བས་བསྐོར་ཏེ། རྡོ་རྗེ་མཁའ་འགྲོ་མ་དང་། ལས་དང་། པདྨ་དང་། རིན་ཆེན་རིགས་དང་། སངས་རྒྱས་རིགས་དང་། དམ་ཚིག་དང་། སྣ་ཚོགས་དང་། འཇིག་རྟེན་མཁའ་འགྲོ་དང་། བཅས་པ་བཞུགས། ལྷན་ཅིག་སྐྱེས་མ་གསང་བའི་ཡུམ་ནི། འཇིགས་བྱེད་དང་དུས་མཚན་མོའི་གདན་ལ་གཡས་བརྐྱང་གཡོན་སྐུམ་གྱི་ཚུལ་དུ། ཕྱག་གཡས་ན་རྡོ་རྗེ་གྲི་གུག་དང་ཐོད་པ་བདུད་རྩིས་བཀང་བ་གཡོན་ན་འཛིན་པའོ། །ཕྱག་རྒྱ་ལྔ་ཡིས་བརྒྱན་ཅིང་། ཡོན་ཏན་གྱི་ཆོས་ཐམས་ཅད་ཡོངས་སུ་རྫོགས་པའི་ཕྱིར་བརྒྱན་(རྒྱན་)དང་ཆ་ལུགས་དང་ལྡན་པའོ། །དེ་ལ་དུར་འཁྲོད་(ཁྲོད་)བརྒྱད་ཀྱིས་ཡོངས་སུ་བསྐོར་བ་སྟེ། ཤར་དུ་གཏུམ་དྲག་དང་རྒྱལ་པོ་ཨིན་དྲ་བོ་དེ་དང་། བྱང་ཚང་ཚིང་འཁྲིགས་པར་ཀུ་ཀུ་རི་པ་དང་། ནུབ་དུ་(ཏུ་)ཨུ་བརྒྱན་(རྒྱན་)དུ་པདྨ་བཛྲ་དང་། ལྷོ་འཇིགས་སུ་རུང་བར་གླུ་གྲུབ་(ཀླུ་སྒྲུབ་)སྙིང་པོའོ། །མཚམས་སུ་ནི་ཤར་ལྷོར་དཔལ་གྱི་ནགས་སུ་ཌོཾ་བྷི་ཧེ་རུ་ཀ་དང་། ལྷོ་ནུབ་མུན་པ་མི་ཟད་པར་རྡོ་རྗེ་དྲིལ་བུ་དང་། ནུབ་བྱང་ཀི་ལི་ཀི་སྒྲ་སྒྲོགས་སུ་ལུ་ཧི་པ་དང་། བྱང་ཤར་ཧ་ཧ་རྒོད་པར་དཔལ་ས་ར་ཧ་ཆེན་པོ་ཡུམ་དང་བཅས་པའོ། །དེ་དག་ཀྱང་ཞིང་སྐྱོང་ཤིང་བརྒྱད་ལ་གནས་པ་དང་། ཕྱོགས་སྐྱོང་བ་དང་། ཀླུའི་རྒྱལ་པོ་དང་། ཕྲ་མེན་མཁའ་འགྲོ་མ་དང་བཅས་པ་མ་འདྲེས་པ་ཡོངས་སུ་རྫོགས་པ་སྟེ། འཇིག་རྟེན་པ་དང་འཇིག་རྟེན་ལས་འདས་པའི་ཡོན་ཏན་ཐམས་ཅད་རྫོགས་པའི་གནས་མཆོག་ཏུ་གྱུར་པ་ཡིན་ནོ། །སངས་རྒྱས་ཀྱིས་(ཀྱི་)སྤྲུལ་པ་ཏཱཻ་ལཱོ་པ་ལ་རྣམ་པར་ཐར་པ་བསམ་གྱིས་མི་ཁྱབ་བརྗོད་ཀྱིས་མི་ལང་བ་ཡིན་ཡང་། མདོར་
1-1-55b
བསྡུས་པའི་ཡོན་ཏན་བཞི་ལས། དང་པོ་མི་རང་རྒྱུད་ཀྱིས་བསྡུས་པའི་ཡོན་ཏན་བསྟན་པ་ལ་ཡང་བཅུ་ཅིག་(གཅིག་)ཡོད་པ་ལས། སྐུ་འཁྲུངས་པ་ནས་མཁའ་འགྲོ་མ་ཟིལ་གྱིས་མནན་ཅིང་ཆོས་གསན་པའི་ཡོན་ཏན་ནི། རྒྱ་གར་ཤར་ཕྱོགས་ལས་ཟ་ཧོར་གྱི་བྱེ་བྲག །གྲོང་ཁྱེར་ཛྷ་ཀོ་ར་ཞེས་བྱ་བ་འདོད་པའི་ཡོན་ཏན་དུ་མ་དང་ལྡན་པ་རིག་པའི་གནས་དུ་མའི་འབྱུང་གནས་དེར། ཡབ་བྲམ་ཟེ་གསལ་བ་ཞེས་བྱ་བ་ཁྱད་པར་དུ་འཕགས་པ་དང་། ཡུམ་བྲམ་ཟེ་མོ་གསལ་ལྡན་མ་ཞེས་བྱ་བ་གཉིས་ལ། སྲས་མོ་བྲམ་ཟེ་མོ་གསལ་སྒྲོན་མ་ཞེས་བྱ་བ་ཅིག་འཁྲུངས། ཕྱིས་སྲས་ཀྱིས་དབེན་གནས་པ་ལ་བྲམ་ཟེ་དང་དྲང་སྲོང་འཇིག་རྟེན་པའི་ལྷ་ཐམས་ཅད་ཀྱང་མཆོད། ཁྱད་པར་དུ་དཀོན་མཆོག་གསུམ་ལ་མཆོད་པ་རྒྱ་ཆེན་པོ་ཕུལ་ཞིང་གསོལ་བ་བཏབ་པས། དཔལ་བདེ་མཆོག་དང་རྗེ་བཙུན་མ་ལ་ཡང་གསོལ་བ་བཏབ་པས། ཟླ་བ་དགུ་ངོ་བཅུ་ན་སྲས་ཅིག་བཙས་པའི་ཚེ། རྒྱ་གར་ཤར་ཕྱོགས་དེ་ཐམས་ཅད་འོད་ཀྱིས་ཁྱབ་པར་གྱུར་བས། དེའི་ཚེ་བྲམ་ཟེ་མཚན་མཁན་སྤྱན་དྲངས་ནས་མཚན་བལྟས་བརྟགས་པའི་ཚེ། རེས་འགའ་ལྷ། རེས་འགའ་ཀླུ། རེས་འགའ་མི། རེས་འགའ་སངས་རྒྱས་ཉིད་ཀྱིས་མཚན་ལྟས་སུ་བྱུང་བས། དེར་གང་ཡིན་མ་ཤེས་ཏེ། རང་བཞིན་ཁྱད་པར་འཕགས་པར་ཤེས་ནས། འདི་ནི་ལྷ་ཀླུ་གནོད་སྦྱིན་དང་། སངས་རྒྱས་གང་ཡིན་མ་འཚལ་ཏེ། སྐྱེས་བུ་ངོ་མཚར་ཅན་གྱིས་མཆོག །འདི་ནི་ཤིན་ཏུ་ལེགས་པར་སྐྱོངས། །ཞེས་ཟེར་ནས། མཚན་ཡང་བྲམ་ཟེ་གསལ་འོད་དུ་བཏགས་སོ། །ཟས་དཀར་གསུམ་མངར་གསུམ་ལ་སོགས་པ་ལ་བརྟེན་ནས། གཅེས་པར་སྐྱངས་པ་ལ། ཤིན་ཏུ་བསྐྱེད་ཆེ་བར་བྱུང་སྟེ། ལོ་གཅིག་ལོན་པའི་དུས་སུ་ཡུམ་གྱིས་དར་དཀར་ལ་དྲིལ་ཏེ་
1-1-56a
ཉི་གྲིབ་མཚམས་སུ་བཞག་པའི་ཚེ། སྙན་པའི་ཚིག་གིས་འབྲོང་ཞིང་ཡོད་ཙམ་ན། བུའི་སྟེང་དུ་སྔར་མཐོང་མ་མྱོང་བའི་གྲིབ་མ་འཇིགས་པ་ཅིག་བྱུང་བས། རྒྱབ་ངོས་སུ་བལྟས་ཙམ་ན་བུད་མེད་རྒན་མོ་མི་སྡུག་པའི་མཚན་སུམ་བཅུ་(ཅུ་)རྩ་གཉིས་དང་ལྡན་པ་ཅིག་བྱུང་ནས། ཡུམ་ཤིན་ཏུ་སྐྲག་ཏེ་(སྟེ་)ཁྱོད་འདིར་མ་འདུག་པར་སོང་བྱས་པས། དེ་ན་རེ་གཅེས་པར་བྱས་ཀྱང་མི་འཆིའ་(འཆི་)བའི། །ས་ཕྱོགས་དེ་ནི་ཡོད་མ་ཡིན། །ཟེར་ཞིང་སོང་བ་ལ་མས་དྲིས་པ། ཐབས་ཇི་ལྟར་བྱས་ན་མི་འཆི་བྱས་པ་ལ། གཞོན་ནུ་མ་མཛེས་པའི་མཚན་དང་ལྡན། དམ་ཆོས་བརྡའ་སྐད་ཕྲད་ན་བདེ་ཟེར། དེར་བརྡའ་དང་སྒྲ་རྣམས་སླབས་པས། མ་ཐོགས་པར་ཤེས་ཏེ་དེ་ནས་ལོ་བརྒྱད་ལོན་པའི་ཚེ་དཔལ་ཕྱག་ན་རྡོ་རྗེ་ཞལ་གཟིགས་ནས་བྱིན་གྱིས་བརླབས། ལོ་ཡང་བཅུ་གཉིས་ལོན་པའི་ཚེ། རིགས་བྱེད་ལ་བྱང་ཞིང་ལེགས་པའི་ཡོན་ཏན་དུ་མ་མངའ་བ་ཅིག་བྱུང་སྟེ་གནས་པ་ལས། བཅུ་དྲུག་ལོན་པའི་ཚེ་དཔལ་བདེ་མཆོག་ལྷ་ལྔ་ལུས་ཀྱི་དཀྱིལ་འཁོར་ཞལ་གཟིགས་ནས་དབང་བསྐུར་བྱིན་གྱིས་བརླབས་ཏེ་སྐུ་གསུང་ཐུགས་ནུས་པ་དང་ལྡན་པར་གྱུར་ནས། ལོ་ཉི་ཤུ་རྩ་མང་དུ་ལོན་པའི་ཚེ། ཡང་སྔར་གྱི་མཁའ་འགྲོ་མ་རྒན་མོ་འཇིགས་སུ་རུང་བ་དེ་བྱུང་ནས། ཡི་གེ་འབྲི་ཞིང་མ་ཧེ་སྐྱོངས། །ལྟོས་མེད་ས་ལའི་ནགས་གསེབ་ཏུ། །ཁྱེའུ་བྲམ་ཟེ་གསལ་འོད་ཐོབ། །མཁའ་འགྲོ་མའི་ལུང་བསྟན་འབྱུང་། །ཅེས་(ཞེས་)ཟེར་བ་ལས། ཡབ་ཡུམ་ཞལ་ནས། དེ་སྔ་ཕན་ཆོད་ཀྱང་ལུང་བསྟན་ཅིང་ཟེར་བ་བདེན། ད་ཡང་ལུང་བསྟན་གྱིས་རྗེས་སུ་འབྲང་དགོས་ཟེར་ནས། དེར་ནང་པར་མ་ཧེ་རྣམས་ཡབ་དང་གཉིས་ཀྱིས་དེད་ནས་ཡབ་ཁང་པར་སོང་། སྲས་ཀྱིས་མ་ཧེ་རྣམས་གཟན་ལ་བརྒྱབ་ནས་ཤིང་ས་ལའི་སྡོང་པོ་
1-1-56b
ཅིག་ལ་རྒྱབ་གཏད་ནས་ཡི་གེ་འདྲི་ཞིང་བསྡད་པས། ཡང་བུད་མེད་མི་སྡུག་པའི་མཚན་སུམ་བཅུ་(ཅུ་)རྩ་གཉིས་དང་ལྡན་པ་དེ་བྱུང་ནས། ཡུལ་ལ་སོགས་པ་གང་ཡིན་ཞེས་ཞིབ་ཏུ་འདྲིར་བྱུང་བ་ལ། ཡུལ་ནི་གྲོང་ཁྱེར་ཛྷ་ཀོར་ཡིན། །ཕ་ནི་བྲམ་ཟེ་གསལ་བ་ཡིན། །མ་ནི་བྲམ་ཟེ་གསལ་ལྡན་མ། །སྲིང་མོ་བྲམ་ཟེ་གསལ་སྒྲོན་ཡིན། །ང་རང་བྲམ་ཟེ་གསལ་འོད་ཡིན། །ཤིང་ནི་ས་ལའི་སྡོང་པོ་ཡིན། །མ་ཧེ་ནོར་ཕྱིར་སྐྱོང་ཞིང་འཚོ། །ཡེ་གེ་བྲིས་ནས་དམ་ཆོས་བྱེད། །བྱས་པས། བུད་མེད་དེ་ཁྲོས་ནས་ཡུལ་ལ་སོགས་པ་དེ་ཐམས་ཅད་དེ་ལྟར་མིན་ཞེས་ཟེར། ཡང་ཡི་གེ་བལྟས་པས་སངས་མི་རྒྱ་སངས་རྒྱ་ན་མུན་ལིང་གི་རང་བྱུང་ཆེན་པོའི་དེ་བཞིན་ཉིད་ཀྱི་སངས་རྒྱས་གར་སོང་ཅེས་(ཞེས་)ཟེར་ཞིང་འདུག་པ་ལ། སྲས་ཀྱང་ཅུང་ཟད་སྐྲག་ནས་ཇི་ལྟར་ཡིན་དྲིས་པས། ཨེ་མ་དེ་ལྟར་ག་ལ་ཡིན། །ཡབ་ནི་བདེ་མཆོག་འཁོར་ལོ་ལ། །ཡུམ་ནི་རྡོ་རྗེ་རྣལ་འབྱོར་མ། །སྲིང་མོ་ལྷ་མོ་བདེ་སྟེར་མ། །ཡུལ་ནི་ནུབ་ཕྱོགས་ཨུ་བརྒྱན་(རྒྱན་)ཡིན། །མིང་པོ་པན་ཙ་པ་ན་ཡིན། །བྱང་ཆུབ་ཤིང་གི་ནགས་ཚལ་དུ། །ཉམས་མྱོང་མ་ཧེ་སྐྱོང་འདོད་ན། །སྙན་རྒྱུད་ཡི་གེ་མེད་པའི་དོན། །ཕྱི་ནང་གསང་གསུམ་ལྡན་པའི། །དྲི་དང་མཁའ་འགྲོ་མ་ལ་ཡོད། །ལུང་བསྟན་དམ་ཚིག་ལྡན་པའི། །གྲུབ་ཐོབ་ཁྱེད་ཀྱིས་བླངས་ན་ལོན། །ཅེས་གསུང་། དེར་མཁའ་འགྲོ་མར་ཤེས་ཏེ། ལམ་ཤིན་ཏུ་བགྲོད་པར་དཀའ་བས་ངས་འགྲོ་བའི་ཐབས་མེད་ཅེས་ཞུས་པས། རིན་པོ་ཆེ་ཤེལ་གྱི་སྐས་དང་། རིན་པོ་ཆེའི་ཟམ་པ་དང་། ལྡེ་མིག་གཅིག་དང་གསུམ་བསྐུར་ཏེ། ངས་བྱིན་གྱིས་བརླབས་པས་ཚེགས་མི་ཆེའི་ཟེར་ཏེ། སྐས་དང་ཟམ་པས་རྒྱ་འོབས་འཇོམས། །ལྡེ་མིག་འབྲས་བུས་ལྕགས་རྣམས་ཁྲོལ། །ཞེས་གསུངས་ཏེ། ཚམ་ཚོམ་མེད་པར་སོང་གསུང་ནས། ཕ་མ་ལ་ཞུས་
1-1-57a
པས། མ་ཤིན་དུ་(ཏུ་)མི་དགའ་བ་ལ་ཡབ་ཀྱིས་ཁོ་རང་ཅི་གསུང་པ་བཞིན་བྱས་པས་ཆོག་ཏེ་(སྟེ་)འོང་། །དེ་ལྟར་གྱིས་ཤིག་གསུང་ནས། རྫས་རྟེན་འབྲེལ་གསུམ་པོ་ཁྱེར་ནས་ནུབ་ཕྱོགས་ཨུ་བརྒྱན་(རྒྱན་)དུ་འགྲོ་བའི་ལམ་ཐམས་ཅད་ཐོགས་པ་མེད་པར་ཆོད་ནས། གྷན་དྷོ་ལ་ཆེན་པོའི་ཕྱིའི་ལྕགས་རིའི་དྲུང་དུ་སླེབ་(སླེབས་)ཏེ། དུག་མཚོའི་འོབས་ལ་ཟམ་པ་བྱས། ལྕགས་རི་ལ་སྐས་བཙུགས་ནས་གཙུག་ལག་ཁང་གི་ཕྱི་སྒོའི་དྲུང་དུ་འགྲོ་བ་ལ་ལྕགས་ཕྱེ་ནས་ཕྱིན་པ་དང་། ཕྱི་སྦྲུལ་སྐུ་ཟ་བྱེད་ལས་ཀྱི་མཁའ་འགྲོ་མ་དེ། འཇིགས་པའི་གཟུགས་སྣ་ཚོགས་ནི་སྟོན། མི་སྙན་པའི་སྒྲ་ང་རོ་སྣ་ཚོགས་སྒྲོགས་ཤིང་། ད་ནི་ཟ་བྱེད་མཁའ་འགྲོ་མ། །ཤ་ལ་དགའ་ཞིང་ཁྲག་ལ་རྔམ། །ཞེས་ཟེར་བ་དང་། དེར་ལུས་ཀྱི་འཇིགས་པའི་ལྟ་སྟངས། ངག་གི་རྔམ་པའི་ལྟ་སྟངས། སེམས་ཀྱིས་སྐྲག་པའི་ལྟ་སྟངས་གསུམ་བྱས་དེ་སླར་ལ་ཕར་བྱོན་ཏེ། ཆེར་འཇིགས་མཁའ་འགྲོ་དུ་མས་ཀྱང་། །ངའི་བ་སྤུའི་རྩེ་མི་གཡོའ། །དེར་ཐམས་ཅད་བརྒྱལ་བ་སངས་པ་དང་། བཟོད་གསོལ་བྱས་ཏེ་མར་མེ་ལ་ནི་སྦྲང་མ་བཞིན། །བདག་འཇོམས་སྒོ་མ་ག་ལ་འོང་། །བདག་ནི་རྨངས་ལྟར་དབང་གྱུར་པས། །ཁར་བློན་མ་ལ་མ་དྲིས་ན། །བདག་གི་ཤ་ཟ་ཁྲག་འཐུང་བས། །དམ་པ་བདག་ལ་ཉེར་དགོངས་མཛད། །ཅེས་ཟེར་ནས། ནང་དུ་འདྲིར་སོང་བས་ལོངས་སྐུ་འཇིག་རྟེན་ལས་ཀྱི་མཁའ་འགྲོ་མ་སྔར་བཞིན་དུ་བྱུང་བ་ལ་སླར། ལུས་མི་སྒུལ། ངག་མི་རྫི། སེམས་ཟིལ་གྱིས་མི་ནོན་པའི་ལྟ་སྟངས་དང་གསུམ་མཛད་དེ། སྔར་བཞིན་དུ་བྱུང་སྟེ། བཟོད་པར་གསོལ་ནས་ནང་དུ་འདྲིར་འོངས་པས། རྗེ་བཙུན་མ་ཡེ་ཤེས་མཁའ་འགྲོས་རས་དམར་པོ་དྲི་མ་མེད་པས་གདོང་བཀབ་ཏེ་(སྟེ་)སྐལ་བ་བཟང་པོ་ཅན་ནང་དུ་ཐོང་ཅིག་གསུང་ནས་བཏང་བའི་དུས་སུ་རྗེ་ཏེ་ལོ་པས་ཕྱག་མ་བྱས་པས། རྟོགས་པ་ཅིག་གིས་ངོ་བོར་བཞུགས་
1-1-57b
པས་མཁའ་འགྲོ་མ་དཔག་ཏུ་མེད་པ་རྣམས་བསྟན་(སྟན་)ལས་ལངས་ནས། འདི་ནི་དུས་གསུམ་སངས་རྒྱས་ཀྱི། །ཡུམ་གྱུར་བཅོམ་ལྡན་འདས་མ་ལ། །མི་གུས་ཚུལ་ཅན་ཅིས་མི་གཞོམ་ཞེས་གསུང་། དེར་དཔལ་རྗེ་བཙུན་མ་ཉིད་ཀྱི་ཞལ་ནས། འདི་ནི་དུས་གསུམ་སངས་རྒྱས་ཀྱི། །ཡབ་གྱུར་བཅོམ་ལྡན་འགྲོ་བའི་མགོན། །དཔལ་ལྡན་སྡོམ་པའི་བདག་ཉིད་དེ། །འདི་ནི་མཁའ་འགྲོ་རྡོ་རྗེའི། །ཐོག་དང་སེར་བ་དྲག་ཕབ་ཀྱང་། །གཞོམ་པར་མི་ནུས་སྐྱོད་(བསྐྱོད་)མི་འགྱུར། །དེར་རྗེ་བཙུན་མའི་ཞལ་ནས། ཁྱོད་སུ་ཡིན། ལུང་སྟོན་མཁན་སུ་ཡིན། དོན་ཅི་འདོད་ནས་འོངས། དོན་གང་ལ་དགོངས་དྲིས་པས་ཏཱཻ་ལོ་པས། ང་རང་པཉ་ཙ་པ་ན་ཡིན། །སྲིང་མོ་བདེ་སྟེར་མ་ཡིས་བཏང་། །དོན་ནི་ཡང་དག་དོན་ལ་དགོངས། །ཐུན་མོང་མཆོག་གི་ཁྱད་པར་གྱིས། །གསང་ཆེན་བདེ་ཆེན་ཞུ་ཅེས་(ཞེས་)ཞུས་པས། ང་ལ་གསང་མཛོད་གསུམ་མ་ནི། །ཡིད་བཞིན་ནོར་བུ་རྣམ་གསུམ་ཡོད། །མ་རིག་མུན་སེལ་ལྷན་ཅིག་སྐྱེས། །བརྡའ་འདི་ཤེས་ན་ཁྱོད་ལ་སྦྱིན། །ཞེས་གསུངས་ཏེ་དེར་སྐུ་གསུམ་ཐུགས་ཀྱི་བརྡའ་གསང་མཛོད་རྣམ་པ་གསུམ་ལ། སྐུ་རང་བྱུང་དཔལ་ལྷན་ཅིག་སྐྱེས་པ་ཡབ་ཡུམ་གྱི་སྐུ་ཅིག་དང་། གསུང་རྡོའི་ཆོས་འབྱུང་གྲུ་གསུམ་ཅིག་ན་ཡི་གེ་བདུན་པ་རིན་པོ་ཆེ་བེ་དུ་རྱའི་རང་བྱུང་དང་། ཐུགས་ཀྱི་རང་བྱུང་རིན་པོ་ཆེའི་རྡོ་རྗེ་རྩེ་ལྔ་པ་ཅིག་དང་གསུམ་མཐོང་སྟེ། ཆོས་ཀྱི་གསང་མཛོད་དེ་རྒྱུད་གསུམ་དུ་གཟིགས་ཏེ་ཞུས་པ། སྐུ་གསུང་ཐུགས་ཀྱི་གསང་མཛོད་ནས། །ཡིད་བཞིན་ནོར་བུ་རྣམ་གསུམ་པོ། །ལྷ་(ལྟ་)སྒོམ་སྤྱོད་པ་འབྲས་བུ་དང་། །དམ་ཚིག་རང་གྲོལ་གདམས་ངག་ཞུ་ཅེས(ཞེས)། །རང་བྱུང་སྐུའི་དཀོར་མཛོད་ནས། །ཐུན་མོང་ཡིད་བཞིན་ནོར་བུ་ཞུ། །ཡིག་འབྲུ་གསུང་གི་དཀོར་མཛོད་
1-1-58a
ནས། །དམ་ཚིག་ཡིད་བཞིན་ནོར་བུ་ཞུ། །ཕྱག་མཚན་ཐུགས་ཀྱི་དཀོར་མཛོད་ནས། །གནས་ལུགས་ཡིད་བཞིན་ནོར་བུ་ཞུ་ཞེས་བརྗོད་པས། མཁའ་འགྲོ་མ་རྣམས་ན་རེ། སྐུ་གསུང་ཐུགས་ཀྱི་གསང་མཛོད་ནས། །ཡིད་བཞིན་ནོར་བུ་རྣམས་གསུམ་ལ། །དམ་ཚིག་ལུང་བསྟན་གྲུབ་ཐོབ་པས། །རྒྱས་བཏབ་ཕྱིར་ན་སྐལ་ལྡན་ཡང་། །ཁྱེད་ཀྱིས་དཔལ་གྱི་སྒོ་མི་ཕྱེད། །ཅེས་ལན་མདོར་བསྟན་ནས་རྒྱས་པར་ཕྱེ་བ་ནི། རང་བྱུང་སྐུའི་སྐོར་མཛོད་ནས། །ཐུན་མོང་ཡིད་བཞིན་ནོར་བུ་ལ། །ལུང་བསྟན་ལྡན་པས་ལྕགས་བཅུག་པས། །མ་བསྟན་པ་ཡིས་ཕྱེད་མི་འགྱུར། །ཡིག་འབྲུ་གསུང་གི་ཀོར་(དཀོར་)མཛོད་ནས། །དམ་ཚིག་ཡིད་བཞིན་ནོར་བུ་ལ། །དམ་ཚིག་ལྡན་པས་ལྕགས་བཅུག་པས། །མི་ལྡན་པ་ཡིས་ཕྱེད་མི་འགྱུར། །ཕྱག་མཚན་ཐུགས་ཀྱི་དཀོར་མཛོད་ནས། །གནས་ལུགས་ཡིད་བཞིན་ནོར་བུ་ལ། །གྲུབ་པ་ཐོབ་པས་ལྕགས་བཅུག་པས། །མ་ཐོབ་པའི་ས་ཕྱེད་མི་འགྱུར། །ཞེས་གསུངས་པ་ལ། རྗེ་ཏྰཻ་ལོ་པས་དེ་གསུམ་ཡོད་པའི་ལན་བཏབ་པ། ལུང་བསྟན་དམ་ཚིག་ལྡན་པའི། །གྲུབ་ཐོབ་ཁྱེད་ཀྱིས་བླངས་ན་ལོན། །ས་ལའི་ཚལ་གྱི་ནགས་འདབ་ན། །མཁའ་འགྲོས་ལུང་བསྟན་ལྡེ་མིག་ཡོད། །ཅེས་གསུངས་པ་ལ། མཁའ་འགྲོ་མ་ཐམས་ཅད་ཀྱིས་བརྡའ་སྐད་དང་བཅས་པས་ཐལ་མོ་བརྡབས་ཏེ། ཁྱོད་ལ་ལུང་བསྟན་པ་དེ་བདུད་ཀྱིས་སླུས་པ་ཡིན་ཞེས་པ་ནི། དམུས་ལོང་བལྟས་པས་གཟུགས་མི་མཐོང་། །འོ་ན་པས་ཉན་བཅུག་སྒྲ་མི་ཐོས། །ལྐུགས་པས་སྨྲས་པས་དོན་མི་གོ། །ཞ་བོས་རྒྱུགས་པས་རྗེས་མི་སླེབ། །བདུད་ཀྱི་བསླུས་ལ་བདེན་པ་མེད། །ཅེས་གསུངས་པས། རྗེ་ཏེ་ལོ་པས་ལན་བཏབ་པ། རྫུན་ནི་ཉེས་པའི་ཚིག་ཡིན་ཏེ། །ཉེས་པ་ཟད་པ་རྫུན་གྱི་ཚིག །སྨྲ་བར་མི་འགྱུར་རྒྱུ་མེད་ཕྱིར། །ནམ་ཡང་གསུངས་པ་མེད་པས་ན། །བདུད་
1-1-58b
མིན་མཁའ་འགྲོ་མ་རུ་བདེན་ཞེས་ཞུས་ཤིང་། ལྡེ་མིག་ཡོད་པའི་དོན་གསུངས་པ། །གསང་བ་མཛོད་གསུམ་རྒྱས་བཏབ་ལ། །གནད་ཀྱི་ལྡེ་མིག་རྣམ་གསུམ་གྱིས་རིམ་པ་གསུམ་དུ་དབྱེ་བ་ནི། དྲ་བ་སྡོམ་པའི་རྒྱུད་དོན་ཡིན། །མཁའ་འགྲོ་གསང་ཚིག་ཐུགས་ཀྱི་སྡོམ། །མ་རིག་མུན་སེལ་ཡེ་ཤེས་སྒྲོན། །རང་རིག་རང་བྱུང་རང་གསལ་བའི། །དམ་ཚིག་རང་བྱུང་ལྡེ་མིག་ཡོད། །གང་ཡང་སྐྱེ་བ་མེད་པའི། །སེམས་ཉིད་ཆོས་ཉིད་ཆོས་སྐུ་རུ། །ལུང་བསྟན་ཕྱག་རྒྱ་ཆེན་པོའི། །ལྷུན་གྲུབ་ཉམས་ཀྱི་ལྡེ་མིག་ཡོད། །དམིགས་མེད་ཡིད་ལ་མི་བྱེད་ཅིང་། །དབྱེར་མེད་ལྷན་ཅིག་སྐྱེས་པའི། །དྲན་པ་རྡུལ་ཙམ་མེད་གྱུར་པ། །མི་གནས་བདེ་བ་ཆེན་པོའི། །གྲུབ་ཐོབ་ཉམས་ཀྱི་ལྡེ་མིག་ཡོད། །ཅེས་གསུངས་པས། མཁའ་འགྲོ་མ་རྣམས་མཉེས་ནས། ཚོགས་ཀྱི་འཁོར་ལོ་མཛད་ནས། གསང་བ་སིན་དྷུ་ར་རྡོ་རྗེ་ཡེ་ཤེས་ཀྱི་དཀྱིལ་འཁོར་ལ་བརྟེན་ནས་དབང་བཞི་རྫོགས་པར་ངོ་སྤྲད་པས་དངོས་གྲུབ་གཉིས་བརྙེས་ཏེ། ཡེ་ཤེས་མཁའ་འགྲོས། བདག་གི་ཡབ་གྱུར་བཅོམ་ལྡན་འདས། །བདེ་མཆོག་འཁོར་ལོ་བདེ་བའི་མཆོག །ཏེ་ལོ་སངས་རྒྱས་འགྲོ་བའི་མགོན། །ཡིད་བཞིན་ནོར་བུ་རྣམས་གསུམ་དབུལ་ཅེས་གསུངས་ནས། སྙན་རྒྱུད་བྱིན་བརླབས་དང་བཅས་པ་མ་ལུས་པར་སྣང་ངོ་། །སྤྱིར་དཔལ་འཁོར་ལོ་སྡོམ་པའི་ཆོས་རྒྱུད་མཐའ་དག་གདམས་པ་དང་བཅས་པ་གནང་ཡང་སྙིང་གསང་བའི་དོན་རྣམས་གདམས་ཏེ། རྒྱ་མཚོའི་རྒྱུད་དྲུག་དང་། རྣལ་འབྱོར་མ་བཞིའི་ཁ་སྦྱར་གྱི་རྒྱུད་དང་། ཧེ་རུ་ཀ་བཟང་པོའི་རྒྱུད་དང་། ཧེ་རུ་ཀ་སྙིང་རྗེ་རོལ་པའི་རྒྱུད་དང་། དཔལ་རྡོ་རྗེ་མཁའ་འགྲོའི་རྒྱུད་དང་། བདེ་མཆོག་རྡོ་རྗེ་འཕྲེང་བ་དང་། མཁའ་འགྲོ་མ་གསང་བ་མཛོད་ཀྱི་དང་། རྡོ་རྗེ་འཆང་རང་བྱུང་གྱི་རྒྱུད་ལ་སོགས་པ་མང་དུ་
1-1-59a
གནང་སྟེ། རྒྱུད་བཅུ་གསུམ་གདན་དྲངས་པར་བཞེད་དེ། དེར་མཁའ་སྤྱོད་ཀྱི་དངོས་གྲུབ་ཀྱིས་མཁའ་ལ་གཤེགས་པར་བཞེད་དེ། ནམ་མཁའ་ལ་ནི་བྱ་བཞིན་དུ། །ཐོགས་མེད་ཤེས་རབ་བཟང་པོ་འགྲོ། །སྣང་བ་དབྱིངས་ཀྱི་སྟོང་གསལ་དུ། །རིག་པ་ཡེ་ཤེས་ང་འཕུར་འགྲོ། །ཅེས་(ཞེས་)གསུངས་པས། མཁའ་འགྲོ་མ་ཐམས་ཅད་ཀྱི་ཤོལ་བཏབ་པ། སྐྱེས་བུ་ཁྱོད་ནི་གང་དུ་འགྲོ། །བདག་ཅག་རྗེས་སུ་བཟུང་དུ་གསོལ། །ཅེས་པས་མ་གནང་སྟེ། ན་རོ་རི་རི་ཀ་སོ་རི། །བུད་དྷེ་རྟོགས་དེ་རྣལ་འབྱོར་བདག །གཙུག་གི་ནོར་བུའི་དགོན་པར་འགྲོ། །གསུང་ནས་བྱོན་པ་དང་། བར་སྣང་ཁམས་སུ་ལུས་མེད་མཁའ་འགྲོ་མས་སྐུ་ལུས་མི་སྣང་བར་སྒྲའི་སྒོ་ནས་ཆོས་དགུ་གསུངས་པ་ནི། སྤྱོད་པ་ཆུ་ལ་རལ་གྲི་རྒྱོབ། །དམ་ཚིག་རང་སེམས་མེ་ལོང་ལྟོས། །དམ་རྫ་རྟོགས་པའི་ཉི་མ་འདི། །སྨིན་འགྲོལ་སེམས་ཀྱི་རྒྱ་མདུད་ཤིག །རྩ་རླུང་དྲ་བའི་འཁོར་ལོ་བསྐོར། །རིག་པ་ཡེ་ཤེས་སྒྲོན་མེ་ལྟོམས(ལྟེམ)། །རོ་སྙོམས་ཕྱིའི་མེ་ལོང་ལྟོས། །རང་གྲོལ་ཕྱག་རྒྱ་ཆེན་པོ་ལྟོས། །བདེ་ཆེན་གསུང་གི་རིན་ཆེན་ཆོངས། །ཞེས་ཆོས་སྐོར་དགུ་གསུངས་པས། དེར་གདམས་པ་རྣམས་ཇི་ལྟ་བར་ཐུགས་སུ་ཆུད་དེ། སྒྱུ་མ་ལུས་ཀྱི་གྷན་དྷོ་ལིར། །ལུས་མེད་མཁའ་འགྲོའི་གསུང་བཅུག་སྟེ། །བརྗོད་མེད་དག་གི་ལྕགས་བཅུག་ནས། །འོད་གསལ་མཁའ་ལ་གཉིས་མེད་འགྲོ། །ཞེས་གསུངས་ནས་གཙུག་གི་ནོར་བུའི་དགོན་པར་བྱོན་ནོ། །དེ་རྣམས་ནི་མཁའ་འགྲོ་མ་ཟིལ་གྱི་(གྱིས་)མནོན་ཅིང་ཆོས་གསན་པའི་ཡོན་ཏན་ནོ། །
༈ མིའི་བླ་མ་མེད་པར་བསྟན་པའི་ཡོན་ཏན།
གཉིས་པ་མིའི་བླ་མ་མེད་པར་བསྟན་པའི་ཡོན་ཏན་ནི། དེར་རྗེ་ཏེ་ལོ་པས་ཨུ་བརྒྱན་(རྒྱན་)དུ་བྱོན་ནས་ཡེ་ཤེས་མཁའ་འགྲོ་ལ་ཆོས་གསན་ནས་གྲུབ་པ་ཐོབ་ཞེས་གྲགས་པས། རྒྱ་གར་ཤར་ནུབ་ཐམས་ཅད་དུ་སྙན་པས་ཁྱབ་པས། མི་རྣམས་ཀྱིས་
1-1-59b
ཁྱེད་བླ་མ་གང་དང་འཇལ་(མཇལ་)ཞུས་པས། ང་ལ་མིའི་བླ་མ་མེད། །ངའི་བླ་མ་ཐམས་ཅད་མཁྱེན་ཅེས་པ་དང་། བདེན་པ་གཉིས་ལ་མངོན་གྱུར་ཏྭེེ་ལོ་པ། །རིག་པའི་གནས་ལྔ་དག་ལ་མཁས་པས་ཏེ། །ཁྱོད་ལ་མིའི་བླ་མ་ཡོད་མེད་དེ། །དེའི་བླ་མ་གང་ཡིན་ཐམས་ཅད་མཁྱེན། །ཅེས་མཁའ་འགྲོ་མ་རྣམས་ཀྱིས་ནམ་མཁའ་ནས་གསུངས་པའོ། །དེར་གཞན་མ་དད་པ་གསལ་བའི་ཕྱིར་མིའི་བླ་མ་ཡོད་པར་བསྟན་པ། ཕྱོགས་བཞིའི་བླ་མ་བཞི་ལས་བཀའ་བབས་བཞི་བབས་པར་བསྟན་པ་ནི། སློབ་དཔོན་ཙརྱ་པ་ལས་རྒྱུད་བདེ་མཆོག་འཁོར་ལོ་ལ་བརྟེན་ནས་གཞི་ལམ་འབྲས་བུ་གསུམ་གྱི་ཆོས་གཏུམ་མོའི་བཀའ་བབས། སློབ་དཔོན་ལྭ་བ་པ་རྒྱུད་དགྱེས་པ་རྡོ་རྗེ་ལ་བརྟེན་ནས་གཉིད་འོད་གསལ་དུ་འཇུག་པ་དང་ལྡོག་པ་ལམ་བརྟེན་མེད་རང་གྲོལ་གྱི་བཀའ་བབས། སློབ་དཔོན་ཀླུ་གྲུབ་(སྒྲུབ་)སྙིང་པོས་གསང་བ་འདུས་པ་ལ་རྟེན་(བརྟེན་)ནས་ཕར་རྒྱུད་གསལ་སྟོང་གཙོ་བོར་སྟོན་པ་སྒྱུ་ལུས་འོད་གསལ་ཟུང་འཇུག་གི་ཆོས་དང་། མཁའ་འགྲོ་མ་སྐལ་བ་བཟང་མོ་ལ་རྒྱུད་སྡོམ་པ་རྒྱ་མཚོ་ལ་བརྟེན་འཕོ་བ་བར་དོའི་བཀའ་བབས་སོ། །དེ་ལྟར་ཡང་ཙརྱ་ཀླུ་གྲུབ་(སྒྲུབ་)ལྭ་བ་པ། །སྐལ་བ་བཟང་མོ་ང་ཡིན། །བཀའ་བབས་བཞིའི་བླ་མ་ཡིན། །ཨིན་ཏྲ་བོ་དེ་ལ་སོགས་ཡིན་ཞེས་གསུངས་སོ། །གཞན་ཡང་སྒྱུ་ལུས་རྨི་ལམ་འོད་གསལ་འཕོ་བ་བར་དོ་གྲོང་འཇུག་གཏུམ་མོ་ཕྱག་རྒྱ་ཆེན་པོ་ལ་ཡང་ཟེར་རོ། །
༈ རྣལ་འབྱོར་པ་ནུས་ལྡན་ཟིལ་གྱི་གནན་པའི་ཡོན་ཏན།
རྣལ་འབྱོར་པ་ནུས་ལྡན་ཟིལ་གྱི་གནན་པའི་ཡོན་ཏན་ནི། ཡུལ་ཕྱོགས་དེ་ན་རྒྱལ་པོ་ཆེན་པོ་ཅིག་མ་ལ་གུས་ཤིང་མའི་ངག་མི་གཅོག་པ་ཅིག་ཡོད་པ་དེས། མ་ལ་དགེ་བའི་རྩ་བ་ཅི་བྱ་ཅེས་(ཞེས་)དྲིས་པས། རྒྱལ་ཁམས་ཀྱི་རིང་གིས་སྐོར་པན་ཌི་ཏ་(པཎྜི་ཏ་)རྣམས་དང་། ཀུ་སུ་ལུ་ཐམས་ཅད་བསགས་ནས། རིན་པོ་ཆེའི་དཀྱིལ་འཁོར་བཞེངས་ནས་ཚོགས་
1-1-60a
འཁོར་བྱས་ཏེ། བསོད་ནམས་ཀྱི་མཐར་ཐུག་ཡིན་ནོ་གསུངས་པས། དེས་མའི་ཆེད་དུ་དེ་ལྟར་བྱེད་དོ་ཅེས་(ཞེས་)ཐམས་ཅད་བསྒྲགས་ཏེ་དུས་བཏབ་བོ། །དེ་རྣམས་བྱོན་ནས་སོ་སོ་རང་རང་གི་དཀྱིལ་འཁོར་བཞེངས་ནས། རྣལ་འབྱོར་པ་ནུས་པ་གང་ཆེ་བ་ཅིག་གིས་དཔོན་བྱེད་པ་ཡིན་པ་ལས། གཞན་གྱིས་མི་འདྲན་(འགྲན་)བཞིན་དུ་ནུས་པ་ཆེ་བ་ཅིག་ལ་ཞུས་ནས་ཁྲི་ལ་བཞུགས་པ་ལ། རྒན་མོ་མི་སྡུག་པའི་གཟུགས་ཅན་ཅིག་ང་ནང་དུ་ཐོང་ཟེར་ཞིང་ཁྲོ་བ་ཅིག་བྱུང་ནས། སྒོ་ཕྱེད་པ་དང་ཚོགས་དཔོན་དེ་ལ་ཁྱོད་ཀྱིས་མི་འོང་ཟེར། ད་ལྟ་ང་བས་དྲག་པ་སུ་ཡིན་བྱས་མོ་ན་རེ་ངའི་མིང་པོས་བྱས་ན་འོང་ཟེར། དེ་གང་ན་བཞུགས་བྱས་པས། དུར་ཁྲོད་འབར་བ་འཛིན་བྱ་བ་ན་ཡོད་ཟེར། དེར་ཚོལ་དུ་ཕྱིན་པས། ལྗོན་ཤིང་ཅིག་གི་ཡལ་ག་ལ་མིའི་རོ་ཅིག་བཀལ། དེའི་རྐང་པའི་མཐེའུ་ཆུང་གཉིས་ལ་རྟ་རྔ་བཏགས་པ་ལ་སྤྱང་མོ་ཉུག་མཛད་ཅིང་བཞུགས་པ་ལ་སྤྱན་དྲངས་པ་དང་། མི་སྔོ་སངས་རས་ཀྱི་ཨང་ག་རེག་གསོལ་པ། སྤྱན་དམར་ལྕི་ལེ་བ་ཅིག་བྱུང་སྟེ། དེར་ཁྲི་གཉིས་ལ་མཉམ་པར་བཞུགས་ནས། ནུས་པ་འདྲན་(འགྲན་)པས། དེས་དཀྱིལ་འཁོར་གྱི་ལྷ་དང་བཅས་པ་ཅིག་བཞེངས་ནས། དེར་ཏེ་ལོ་པས་ཀྱང་བཞེངས་སོ། །དེར་ནུས་ལྡན་གྱིས་མ་ཤིགས་སོ། །སྔ་མ་ནི་ཏེ་ལོ་པས་བཤིག་པའོ། །ཡང་དེར་རོ་གསར་རྙིང་མང་པོ་བཀུག་ནས་ཚོགས་དང་མཆོད་པར་བསྟན་པའི་རྫས་ཡིད་དུ་འོང་བ་མང་པོ་བསྒྱུར་བ་དང་། དེ་ཚོ་ལ་ཏེ་ལོ་པས་དམིགས་པ་གཏད་པས་དུར་ཁྲོད་དུ་སྐྱལ་ལོ། །ཏེ་ལོ་པས་ཀྱང་དུར་ཁྲོད་ཀྱི་རོ་མཆོད་རྫས་སུ་བསྒྱུར་བ་དང་རྣལ་འབྱོར་པས་མ་ཤིགས་སོ། །དེར་ཏེ་ལོ་པས་ལུས་ལྤགས་པ་ཕྱི་ནང་ཟློག་ནས་བ་སྤུའི་བུ་ག་ལ་རེ་རེ་ནས་གསང་སྔགས་ཀྱི་ལྷ་གཞལ་ཡས་ཁང་དུར་
1-1-60b
ཁྲོད་དང་བཅས་པ་རེ་རེ་དང་། འཛམ་བུའི་གླིང་དུ་མ་ན་སངས་རྒྱས་མང་པོ་བཞུགས་པས་སེམས་ཅན་སྨིན་པ་དང་གྲོལ་བར་མཛད་པ་དང་དཔག་ཏུ་མེད་པ་སྤྲུལ་པ་དང་། དེ་ནས་སེང་གེ་ལ་ཞོན་ནས་ཉི་ཟླ་ས་ལ་ཕབ་ཏེ(སྟེ)། དེའི་སྟེང་དུ་ཕར་རྒྱུག་ཚུར་རྒྱུག་བྱས་པ་དང་། དེས་གང་ཡང་མ་བྱུང་བས་སླར་དད་ཏེ(དེ)། ཨེ་མ་འདི་ནི་ངོ་མཚར་ཆེ། །ངོ་མཚར་རྫུ་འཕྲུལ་འདི་ལྟ་བུ། །རྒྱུ་ནི་ཅི་ལས་བྱུང་བ་ཡིན། །འདི་འདྲའི་རྣལ་འབྱོར་གང་ནས་བྱོན་ཞེས་ཟེར་བས། ང་ནི་ཏེ་ལོ་འགྲོ་བའི་མགོན། །ཁྱོད་ནི་མཐོང་མེད་རྣལ་འབྱོར་ཡིན། །ཅེས་གསུངས་སོ། །དེར་ཚོགས་དཔོན་མཛད་དེ། དེར་རྣལ་འབྱོར་པ་ནུས་ལྡན་གྱི་ཕྱག་བྱས་སྐོར་བ་བྱས་མཎྜལ་ཕུལ་ནས་གདམས་ངག་ཞུས་སོ། །དེ་ནི་ནུས་ལྡན་བློ་གྲོས་ད་ལྟ་ཨུ་བརྒྱན་(རྒྱན་)ན་བཞུགས་སོ། །
༈ མུ་སྟེགས་པ་བརྟུལ་བའི་ཡོན་ཏན།
མུ་སྟེགས་པ་བརྟུལ་བའི་ཡོན་ཏན་ནི། ཡུལ་ཕྱོགས་དེ་ན་མུ་སྟེགས་ཀྱི་པན་ཊི་ཏ་(པཎྜི་ཏ་)མཁས་ཤིང་ནུས་པ་ཆེ་བ་ཅིག་གིས་སངས་རྒྱས་ཀྱི་བསྟན་པ་ནག་འབྱམ་ལ་བཏང་བས། དེར་གཏུལ་(གདུལ་)བྱར་གཟིགས་ནས་ཁོ་ཆོས་འཆད་པའི་མདུན་ན་ཕར་ཕྱིན་པས། ཁྱེད་ལ་བརྩོད་(རྩོད་)པ་རྡོ་བ་ཅིག་འདུག་ཟེར་ཏེ། ཁྱོད་དང་ང་གཉིས་ནུབ་(ནུས་)པ་དང་བརྩོད་(རྩོད་)པ་གང་ལ་ཡང་འགྲན་གྱིས་ཟེར་ནས་རྒྱལ་པོ་སྤང་(དཔང་)པོར་གཞག་(བཞག་)སྟེ་དུས་བཏབ་བོ། །གང་རྒྱལ་བའི་བསྟན་པ་ལ་འཇུག་པའི་ཆེད་བྱས་པས། དེར་ཁྲི་གསུམ་ལ་རྒྱལ་པོ་དང་རྣམ་གཉིས་བཞུགས་ཏེ། དང་པོ་སྒྲ་ཚད་དང་ལུང་རིགས་ལ་བརྩད་པས་ཀྱང་ལན་གསུམ་བར་དུ་རྒྱལ། དེ་ནས་ནུས་པའི་རྫུ་འཕྲུལ་འགྲན་ཏེ། གཉིས་ཀས་དཀྱིལ་འཁོར་ལྷ་དང་བཅས་པ་བཞེས་ཤིང་བཤིག་པ་ལ་སོགས་པ་ཐམས་ཅད་མཉམ་པ་ལ། དེས་ཉི་མ་བསྟོད་(སྟོད་)ལ་བཟུང་བས་ཕུལ་ནས་འདས་པར་བྱས། ཏེ་ལོ་པས་བཟུང་བས། དེས་ཕུལ་བར་མ་ནུས་པས། ཏེ་ལོ་པའི་བསྟན་པ་ལ་ཞུགས་
1-1-61a
ལ་སྐྲའི་ལ་བ་བྲེགས་བྱས་པས། དེ་ཁྲོས་ནས་ཁ་ནས་མེ་བྱུང་མེ་སྤར་བས། ཏེ་ལོ་འཇིགས་སུ་མ་ཉན་ཏེ། མུ་སྟེགས་པ་ན་རེ། ཁམས་གསུམ་ཀུན་ཀྱང་གཡོའ་བ་ལས། །ང་ལ་མི་འཇིགས་རྣལ་འབྱོར་སུ་ཅེས་(ཞེས་)པ་དང་། ཏེ་ལོ་པས་མེ་དེ་བས་ཆེ་བ་ཅིག་ཕྱུང་བས། སྔར་གྱི་མེ་དེ་དང་གཉིས་ཀ་བཟློག་ནས་བཏང་བས། སྐྲའི་ལ་བ་ཚུན་ཆད་བསྲེགས་ནས། ང་ནི་འཇིགས་པ་ཀུན་ལས་ནི། །ཡོངས་སུ་གྲོལ་ཕྱིར་ཏེ་ལོ་ཡིན། །ཞེས་གསུངས་པས། མུ་སྟེགས་དེ་འཁོར་དང་བཅས་པ་ཐམས་ཅད་ཀྱིས་ཕྱག་དང་མཎྜལ་ཕུལ་བསྐོར་བ་བྱས་ནས་གདམས་ངག་ཞུས་ཏེ། དེར་ཐམས་ཅད་གྲོལ་ཏེ། ནག་པོ་དགེ་བའི་བསིལ་བའི་ཚལ་ཅེས་སོ། །དེའི་གདམས་ངག་ནི་ཞལ་ལས་ཤེས་པར་བྱའོ། །
༈ སླུ་བྱེད་སྒྱུ་མ་མཁན་གདུལ་བའི་ཡོན་ཏན།
སླུ་བྱེད་སྒྱུ་མ་མཁན་གདུལ་བའི་ཡོན་ཏན་ནི། རྒྱལ་པོ་ཆེན་པོ་ཅིག་ཡོང་བ་ལ། སྒྱུ་མ་མཁན་ཅིག་དང་འདྲས་(འགྲན་)པས་སྒྱུ་མ་མཁན་གྱི་དམག་དྲངས་ནས། ཕོ་བྲང་ལ་ཉེ་བའི་ཡུལ་ཁམས་ཐམས་ཅད་ཕམ་པར་བྱས་པས། རྒྱལ་པོས་སྒྱུ་མར་མ་ཤེས་ནས། མི་རྣམས་བྲེད་ནས་ཇི་ལྟར་བྱ་གྲོས་བྱེད་ཀྱི་བར། བུད་མེད་མི་སྡུག་པའི་མཚན་ཅན་འཁར་བ་ལ་རྟེན་(བརྟེན་)པ་ཅིག་བྱུང་ནས་ཁྱེད་རྣམས་ཅི་བྱེད་ཅེས་ཟེར་རོ། །རྒྱལ་པོ་གཞན་གྱིས་ཡུལ་ཁམས་འཕྲོག་པའི་གྲོས་བྱེད་བྱས་པས། མོ་ན་རེ་ངས་གྲོགས་བྱེད་དགོས་པ་ཡིན། རྒྱལ་པོའི་སྤྱན་སྔར་ཐོང་ཅིག་ཟེར་ནས། རྨངས་(དམངས་)ཀྱིས་ཕྱིར་བྱོན་ལ། དེས་ནང་བློན་ལ། དེས་རིམས་ཀྱི་(ཀྱིས་)རྒྱལ་པོ་ལ་བསྙད་དོ། །རྗེ་ཏེ་ལོ་པ་སྤྱན་དྲངས་པ་དང་། རྗེས་སྤྲུལ་པའི་དམག་གིས་སྒྱུ་མའི་དམག་ཐམས་ཅད་གསད་པས། སྒྱུ་མ་མཁན་གྱིས་ཏེ་ལོ་པར་ཤེས་ཏེ། ཆོས་ལ་རྟེན་པའི་དམ་པ་ཁྱེད། །འདི་ལྟར་བྱ་རུ་ག་ལ་རུང་ཟེར་བས། ཏེ་ལོ་པས་སྒྱུ་མའི་
1-1-61b
སྐྱེས་བུ་བསད་སོགས་པ། །སེམས་མེད་ཕྱིར་ན་སྡིག་པ་མེད་ཅེས་གསུངས་པས། དད་པས་གདམས་ངག་ཞུས་པ་ནི། སླུ་བྱེད་བདེན་སྨྲ་ཧ་ཧ་སྒྲོགས་ཅེས་ཞལ་ལས་རྙེད་པར་འགྱུར།
༈ ཆང་འཚོང་མ་བརྟུལ་བའི་ཡོན་ཏན།
ཆང་འཚོང་མ་བརྟུལ་བའི་ཡོན་ཏན་ནི། ཡང་ཡུལ་ཁམས་ཅིག་དུ་(ཏུ་)ཆང་ཚོང་མ་ཅིག་གི་གན་དུ་བྱོན་ནས། ངེད་ཆང་ཉོ་བས་ཆང་ཁྱེར་ལ་ཤོག་བྱས་པ་དང་། ཆང་ཚོང་མ་ཡིས་རིན་ཅི་ཡོད་ཟེར་བ་ལ། ཉི་གྲིབ་མཚམས་སུ་རི་མོ་ཅིག་བྲིས་ནས་ཆང་རིན་རི་མོ་འདི་འདས་པ་དང་འཇལ་ཟེར་ནས། དེར་རེས་འགའ་བྱི་ལར་སྤྲུལ་ནས་གསོལ། རེས་རྣལ་འབྱོར་པ་མང་པོར་སྤྲུལ་ནས་གསོལ། རེས་རང་ཉིད་ཅིག་པུས་གསོལ་བས། དེའི་ཚེ་ཆང་ཚོང་མ་དེ་ལས་གཞན་པ་ཆང་ཚོང་མ་བདུན་གྱི་ཆང་ཟད་པར་གྱུར་ཏེ། དེ་ནས་ཆང་རིན་ཞུས་པས། རྗེ་བཙུན་གྱི་ཆང་འགུགས་པའི་ཏིང་ངེ་འཛིན་ལ་སྙོམས་པར་ཞུགས་ཏེ། ཚོང་དུས་གཞན་གྱི་ཆང་ཟད་པར་ཀུག་ནས། སྔར་གྱི་སྣོད་སྟོངས་པ་རྣམས་སུ་ལྟོས་ཅིག་གསུངས་པས། ཐམས་ཅད་སྔར་བས་ཀྱང་ཁེངས་ནས་འདུག་པ་དང་། དད་པ་ལྷག་པར་སྐྱེས་ནས་གསོལ་བ་བཏབ་པས། དམ་པ་ཁྱེད་ནི་གང་ནས་བྱོན། བདག་ཅག་རྗེས་སུ་བཟུང་དུ་གསོལ། ཅེས་བྱས་པས། ང་ནི་ཏེ་ལོ་འགྲོ་བའི་མགོན། །ཁྱེད་ཀྱིས་མཐོང་མེད་རྣལ་འབྱོར་ཡིན་ཞེས་སོ། །རྗེས་སུ་བཟུང་བར་ཞུས་པས། གདམས་ངག་བསྟན་ཏེ། དེ་ཉིད་སྐྱེ་བ་དེ་ལ་ཡེ་ཤེས་ཀྱི་མཁའ་འགྲོ་མར་གྱུར་ཏེ་ཆོས་ལ་སྣང་བ་ཐོབ་པའི་རྣལ་འབྱོར་མར་གྱུར་ཏོ། །
༈ ལས་རྒྱུ་འབྲས་ཀྱི་དོན་ལ་རྟེན་འབྲེལ་དངོས་བསྟན་པ།
ལས་རྒྱུ་འབྲས་ཀྱི་དོན་ལ་རྟེན་འབྲེལ་དངོས་བསྟན་པ་ནི། མུ་སྟེགས་པ་རྒྱང་འཕན་གྱི་ལྟ་བ་འཛིན་པ་ཅིག་གིས་ཡུལ་ཁམས་གྱི་མི་ཐམས་ཅད་ལྟ་བ་ལ་བཀོད་པའི། ཡང་ནང་པའི་པཎ་ཊི་ཏ་(པཎྜི་ཏ་)མཁས་པ་ཅིག་གིས་ལས་རྒྱུ་འབྲས་
1-1-62a
བདེན་པར་འདོད་པའི་སུན་ཕྱུང་ཡང་གང་རྒྱལ་ཤན་མ་ཕྱེད་དེ། གཉིས་ཀའི་དཔང་པོ་ཐུག་པ་མ་བྱུང་བས། ཏེ་ལོ་པས་ཁོང་གཉིས་བརྩོད་(རྩོད་)པ་བྱེད་པའི་མདུན་ན་ཚུར་འོངས་པ་ལས། དཔང་པོ་གཅོལ་ཟེར་བ་ཞལ་གྱིས་བཞེས་ནས། རྩོད་པ་བྱས་པས་གང་རྒྱལ་དྲིས་པས། ཏེ་ལོས་ནང་པ་རྒྱུ་འབྲས་ཡོད་པར་འདོད་པ་རྒྱལ་བྱས་པས། འོ་ན་ཁྱེད་རང་དང་བྱ་ཟེར་ནས། རྩོད་པ་བྱས་ཀྱང་ལུང་རིགས་ཀྱིས་ཁོ་སུན་ཕྱུང་ཡང་། དངོས་སུ་མ་མཐོང་བས་མི་བདེན་ཟེར་བ་ལ། ཁྱོད་རང་མིག་ཚུམས་ཅིག་བྱས་ནས་སེ་གོལ་ཅིག་གཏོགས་པས། དམྱལ་བའི་གནས་ཐམས་ཅད་མཐོང་བ་དང་། བཙོ་བསྲེག་ལ་སོགས་པ་ཉམས་སུ་མྱོང་བར་མཐོང་བ་དང་། ཟངས་སྟོང་པ་ཅིག་ན་ཁྲོ་ཆུ་ཁོལ་ཞིང་མི་སྣང་ན་འདི་ན་མེད་པ་ཅི་ཡིན་དྲིས་པས། འདི་ལས་རྒྱུ་འབྲས་མེད་པར་འདོད་པའི་མུ་སྟེགས་པ་རྒྱུ་མི་དགེ་བ་སྣ་ཚོགས་པ་སྤྱད། ཆོས་ལ་ལྟ་བ་ལོག་པ་དེ་ཤི་ཙམ་ན་འཚེད་པ་ཡིན་ཟེར་བས་ཡིད་ཆེས་སོ། །འོན་ཀྱང་མི་དགེ་བ་སྤྱད་པས་དམྱལ་བར་འགྲོ་བ་བདེན་ཏེ། དཀར་པོའི་རྒྱུ་འབྲས་མེད་པས་དགེ་བ་སྒྲུབ་མི་དགོས་ཟེར་བ་ལ། ངས་བསྟན་གྱི་འདོད་ཟེར་ནས་སྐད་ཅིག་གིས་ལྷའི་ཡུལ་སུམ་བཅུ་(ཅུ་)རྩ་གསུམ་དུ་ཁྲིད་པ་དང་། ལྷའི་གཞལ་ཡས་ཁང་རེ་རེའི་ནང་ན་ལྷ་ཕོ་མོ་ཟུང་རེ་འདུག་པ་ལས། ཁང་པ་ལེགས་པ་ཅིག་ན་ལྷ་མོ་རྐྱང་པ་ཅིག་འདུག་པས། འདི་ན་གཉིས་མེད་པ་ཅི་ཡིན་དྲིས་པས། འཛམ་བུའི་གླིང་ན་གྲུབ་མཐའ་བློ་སྒྱུར་རྒྱུ་འབྲས་ཡོད་པར་འདོད་པ་ཅིག་གིས་མི་དགེ་བ་སྤངས་ཤིང་། རྒྱུ་དགེ་བ་ཉམས་སུ་བླངས་པས་འདིར་སྐྱེ་བ་ཡིན་ཟེར་བ་དང་། མུ་སྟེགས་དེ་དད་པ་ལ། ལས་ཀྱིས་འཕངས་པའི་སྡིག་ཅན་ལ། །དམྱལ་བ་རང་སེམས་རང་ལ་འཁོར། །དགེ་བཅུ་སྤྱད་
1-1-62b
པའི་སྐྱེས་བུ་ལ། །བདེ་འགྲོ་རང་སེམས་རང་ལ་འཁོར། །ཅེས་སྣང་བ་རང་སེམས་སུ་ངོ་སྤྲད་པས་དགེ་སྡིག་རྒྱུ་འབྲས་བསྟན་པས་དད་དེ། ཆོས་ཞུས་པས་གྲོལ་བ་ནི་མན་ཏྲི་ཛྙ་ན་ར་ལྡི་ཅེས་པའོ། །
༈ ཤན་པ་བརྟུལ་བའི་ཡོན་ཏན།
ཤན་པ་བརྟུལ་བའི་ཡོན་ཏན་ནི། སྲོག་ཆགས་མང་པོ་བསད་ཅིང་ཁོ་རང་གི་བུ་ཅིག་ཡོད་པ་ལ་སྟེར་བས། དུས་ཅིག་གི་ཚེ་རྗེ་ཏེ་ལོ་པས་གདུལ་བྱར་གཟིགས་ནས་བྱོན་པའི་ཚེ། ཤན་པ་དེས་ཟངས་ནང་དུ་སྲོག་ཆགས་མང་པོ་བསད་པའི་ཤ་རྣམས་བཙོས་པ་ལ། ཤ་རྣམས་ལ་སྤྲུལ་གྱུར་བྱས་ཏེ། བུ་དེ་མི་སྣང་བ་སྦས་ནས་ཤ་དེ་དག་བུའི་ཤར་གྱུར་པ་དང་། ཁོ་རང་གིས་ཟངས་ཁ་ཕྱེ་ནས་བལྟས་པས། ཁོ་རང་གི་བུའི་ཤར་སོང་བ་ལ་བྲེད་དེ་ངུས་པ་ལས། རྗེ་ཏེ་ལོ་པས་སྡིག་མི་བྱེད་པར་སྲོག་གཅོད་པ་སྤོང་ན་བུ་ཡོད་པར་བྱ་གསུངས་པས། དེར་སྡིག་པ་སྤངས། སྔར་བྱས་པ་གཤགས། ཕྱིས་མི་བྱེད་པར་དམ་བཅས་པ་དང་། ལས་ཀྱིས་བྱས་པའི་སྡིག་པ་ནི། །འབྲས་བུ་རང་ལ་སྨིན་པས་སྤང་། །ཞེས་གསུངས་ཏེ། རྗེས་སུ་བཟུང་བས་གྲོལ་བ་ནི། འཛི་ན་བྱང་ཆུབ་དཔལ་གྱི་རི་ཞེས་པའོ། །
༈ གླུ་མཁན་བཏུལ་བའི་ཡོན་ཏན།
སློབ་དཔོན་ཆེན་པོ་ཏེ་ལོ་པས། གླུ་མཁན་བཏུལ་བའི་ཡོན་ཏན་ནི། ཡུལ་ཁམས་ཅིག་ན་གླུ་མཁན་མཁས་པ་ཅིག་གིས་ཁྲོམ་ཆེན་པོ་ཅིག་ལ་གླུ་ལེན་ཅིང་འདུག་པ་ལ། ཁྱོད་ཅི་ལ་ངུ་བྱས་པ་ལ། ཁོ་ཁྲོས་ནས་གླུ་བྱས་པ་ལ། ཀྱེ་མ་ཞེས་པ་ནི་ངུ་བའམ་མྱ་ངན་གྱི་ཚིག་ཡིན་གསུངས་ཤིང་། གླུ་འདྲན་(འགྲན་)པས་ཚངས་པའི་དབྱངས་དང་འཇིག་རྟེན་ལས་འདས་པའི་གླུ་མང་པོ་བྱས་པས། ཁོས་འཇིག་རྟེན་པའི་གླུ་ལས་མ་ཤེས། རྗེ་ཏེ་ལོ་པ་རྒྱལ་པས་ཁོ་ཟིལ་གྱིས་གནན་ཅིང་དད་པར་གྱུར་ཏེ། རྗེས་སུ་བཟུང་བར་ཞུས་ཏེ། དམ་པ་ཁྱེད་ནི་གང་ནས་བྱོན། ང་ནི་ཁྱོད་ཀྱི་ཟིལ་གྱིས་གནན་ཞེས་ཞུས་པས། ང་ནི་
1-1-63a
ཚངས་པའི་འཇིག་རྟེན་ནས། །འདིར་འོངས་གསུང་དབྱངས་ཡན་ལག་མཁན། །རྐྱེན་གྱི་གླུ་མཁན་ཏེ་ལོ་ཡིན། །ད་ལྟ་ཕྱོགས་མེད་ཡོངས་སུ་འགྲོ། །ཞེས་གསུངས་པས། དབྱངས་ལྡན་ལྐུག་པ་ན་ག་ར་ཞེས་པའོ། །
༈ ནུས་པ་མཁན་གདུལ་བའི་ཡོན་ཏན།
ནུས་པ་མཁན་གདུལ་བའི་ཡོན་ཏན་ནི། མཐུ་བོ་ཆེ་ཉི་མ་ཞེས་བྱ་བ་ལ། མི་ཐམས་ཅད་འདུད་དགོས་པས། སྣང་བ་ཐམས་ཅད་འཆིང་བར་བྱེད་པ་ལ། ཉེ་འཁོར་བ་ཡང་འཚེར་ཀམ་མེ་བ་ཅིག་ཡོད་པ་ལ། རྗེ་ཏེ་ལོ་པས་ཁོའི་དྲུང་དུ་ཕྱིན་ནས་སྡང་བའི་ལྟ་ཚུལ་ཅིག་གཉིས་བྱས་པས་ཁྱོད་ལ་ང་མཐུ་བྱེད་ཅེས་ཟེར་ནས་མཐུ་བྱས་ཏེ། ཆོས་སྐྱོང་མི་སྡུག་པའི་ཚོགས་བྱུང་ཚད་ལྟ་སྟངས་ཀྱིས་བསད། ཁོའི་འཁོར་བྱུང་ཚད་ལྟ་སྟངས་ཀྱིས་བསད་པས། ཁོ་ཤིན་ཏུ་སྡུག་བསྔལ་བར་བྱུང་སྟེ་གནས་པ་ལས། རྗེ་ཏེ་ལོ་པས་དྲུང་དུ་བྱོན་ནས། བྱམས་པའི་ལྟ་སྟངས་བྱས་པས་ཁོ་དགའ་བ་ལ། ཕྱིས་སྡིག་མི་བྱེད་ན་གསོལ་(གསལ་)ཐབས་ཡོད་གསུངས་པས། ཁོ་རང་ལ་འཁོར་ཤི་བའི་ཐམས་ཅད་ཀྱི་རྣམ་ཤེས་བཀུག་ནས་གཏད་པས་ཁོ་དགའ་བ་ལ། རྗེ་ཏེ་ལོ་པས། དོན་རྟོགས་རྣལ་འབྱོར་ཏེ་ལོ་པས། །གསད་པ་ཞེས་བྱ་ཅིག་ཀྱང་མེད། །ཤི་ཞེས་བྱ་བའི་རོ་ཡང་མེད། །ཅེས་གསུངས་པས་གྲོལ་ཏེ། ཉི་མ་ཨི་མི་ཙུན་རྡ་གླིང་ཞེས་བྱའོ། །
༄། །མཛད་པ་སྣ་ཚོགས་སུ་བཅས་པའི་ཡོན་ཏན།
དེ་ནས་མཛད་པ་སྣ་ཚོགས་སུ་བཅས་པའི་ཡོན་ཏན་དང་བཅས་པས་བསྟན་ནོ། །དཔལ་བདེ་མཆོག་འཁོར་ལོའི་སྤྲུལ་པར་གྲགས་པའི་ཡོན་ཏན་ནི། ཆུ་བོ་པ་ལ་ན་ཏི་དང་། དུ་ལ་ཁྱེ་ཏྲ་གཉིས་ཀྱི་འགྲམ་དུར་ཁྲོད་འབར་བ་འཛིན་པའི་རྩ། གཙུག་ལག་དུ་ལ་ཁྱེ་ཏྲ་ཞེས་བྱ་བར། མྱ་ངན་མེད་པའི་ཚལ་དུ་ཏེ་ལོ་པས་རབ་ཏུ་བྱུང་སྟེ། དགེ་སློང་གི་བསླབ་པ་མནོས་ནས་མཚན་ཡང་དགེ་སློང་ཀ་ལ་བྷ་ཞེས་ཀྱང་གྲགས་སོ། །གནས་དེ་ན་ཁྲིམས་སུ་བཅའ་བ་ལ། 
1-1-63b
སྔ་དྲོ་སོ་སོ་བྲང་ཁང་དུ་བསྒོམ་ཞིང་བསམ་གཏན་བྱེད། ཕྱི་དྲོ་སྐོར་བ་དང་ཆོས་སྤྱོད་ཐུན་མོང་དུ་ལྷ་ཁང་དུ་བྱེད་པ་ལས། དེ་ལས་མི་མཐུན་པ་བྱས་ན་ཆད་པ་གཅོད་པ་ལ། ཀ་ལ་བྷ་དེ་ལས་བཟློག་ནས། སྔ་དྲོ་ལམ་གཅིག་ཏུ་སྲོག་ཆགས་ཆ་ག་པ་མང་པོ་བསད་ནས་མགོ་ལུས་ཕྲལ་ཏེ་སོ་སོར་སྤུངས། ཆང་ཚོང་མའི་སྤང་མ་འབུར་རེད་པ་རྣམས་ཀྱིས་ཞལ་བཀང་ཞིང་གསོལ་བས། ཞང་པོ་གནས་བརྟན་ཟླ་འོད་གཞོན་ནུས་མ་བཟོད་ནས་གཞན་གྱིས་མཐོང་ན་ཆད་པ་ཆེན་པོ་གཅོད་པས་ཉེ་རིང་བྱེད་ཉེན་ཡོད་པས་ཟེར་ནས་ལྐོག་ཏུ་མཁན་སློབ་བསོགས་ནས་ཀ་ལ་བྷ་དེ་ལྟར་མ་བྱེད། དགེ་འདུན་རྣམས་ལ་གསོའ་སྦྱོང་མི་ཆགས་པས་དེད་འགྲོ་ཟེར་དུ་འོང་ཅེས་གྲོས་བཏབ་པས། དེ་ལྟར་བྱེད་ཟེར་ཞིང་མ་ཉན་པར་སླར་ལ་མང་དུ་གསད་དོ། །ལན་ཅིག་གི་ཚེ་རྒྱལ་པོ་དུས་མཆོད་ལ་བྱོན་པའི་ལམ་ཀ་ནས་དེ་ལྟར་བྱེད་ཅིང་འདུག་པས་མ་དད་པ་ལ། རྒྱལ་པོས་ལོ་རྒྱུས་དྲིས་པའི་ལན་དུ། གནས་གཞི་མྱ་ངན་མེད་ཚལ་དུ། །མཁན་སློབ་མ་དང་ཞང་པོ་ཡིན། །ང་རང་དགེ་སློང་ཀ་ལ་བྷ། །བསྐལ་པ་བྱེ་བ་ཕྲག་བརྒྱ་རུ། །རྒྱལ་བ་ཤཱཀྱ་ཐུབ་པ་དང་། །ཀླུ་སྒྲུབ་ཨ་རྒྱ་(ཨརྱ་)དེ་བ་དང་། །རྡོ་རྗེ་འཆང་དང་ང་གཏམ་བྱས། །ངས་ནི་ཞིང་ཁམས་བརྒྱར་ཡང་ཕྱིན། །སངས་རྒྱས་བརྒྱའི་ཞལ་ཡང་མཐོང་། །ས་རབ་དགའ་བ་ངས་ཀྱང་མཐོང་། །རྟེན་འབྲེལ་རྒྱུ་འབྲས་བདེན་པ་མཐོང་། །ཆོས་ཉིད་ཆོས་སྐུ་མངོན་དུ་གྱུར། །ས་ར་ཧ་ནི་ཆེན་པོས་ཀྱང་། །རྟོགས་པ་ང་ལ་འགྲན་དུ་མེད། །ངས་ནི་སེམས་ཅན་བསད་པ་མེད། །ཞེས་(ཅེས་)བྱ་བ་ལ་སོགས་པ་གསུངས་པས། སེ་གོལ་ཅིག་གཏོགས་པས་སྲོག་ཆགས་ཐམས་ཅད་མགོ་ལུས་འཇར་ཏེ་འོད་དང་བཅས་ཏེ་འཕུར་ནས་སོང་བས། འདི་བདེ་
1-1-64a
མཆོག་འཁོར་ལོའི་སྤྲུལ་པ་ཡིན་པར་འདུག་ཅེས་ཁོང་དུ་ཆུད་ནས་དེ་ལྟར་གྲགས་སོ། །
༄། །བདེ་མཆོག་འཁོར་ལོ་དངོས་སུ་བསྟན་པའི་ཡོན་ཏན།
བདེ་མཆོག་འཁོར་ལོ་དངོས་སུ་བསྟན་པའི་ཡོན་ཏན་ནི། དེའི་དུས་སུ་རྒྱལ་པོ་ཟླ་བའི་ཕོ་བྲང་གི་མདུན་ན་ཕར་བྱོན་པས། བསོད་སྙོམས་ཀྱི་ལས་བྱེད་ཅིང་། དང་པོར་རྟོག་(རྟོགས།)བར་དུ་བསྙེན་བཀུར་བྱེད། ཐ་མ་སྤྱོད་ལམ་ཅི་བྱེད་དང་ཆོས་ཅི་འདུག་འདྲི་བའི་གནས་སྐབས་སུ་ལན་ཅིག་རྒྱལ་པོས་ལྡིང་ཁང་སྟེང་ནས་བལྟས་པས། དགེ་སློང་ཞི་བ་དུལ་བ་སྤྱོད་ལམ་མཛེས་པ་ཅིག་འདུག་ན། རྒྱལ་པོས་མཐོང་ནས་སྤྱོད་ལམ་བརྟགས་པ་དང་། སློབ་དཔོན་མདོ་རྒྱུད་སྔ་ན་མེད་པ་མང་པོ་འདོན་ཅིང་བཞུད་པས། མཆོད་གནས་པཎ་ཌི་ཏ་(པཎྜི་ཏ་)མཁས་པ་ཅིག་གིས་བརྟགས་པས་ཀྱང་། མདོ་དོན་སྔར་ཐོས་མ་མྱོང་བ་ངོ་མཚར་ཅན་ཅིག་འདུག་ཏེ(སྟེ)། དེར་རྒྱལ་པོས་དད་པས་སྤྱན་དྲངས་ཤིང་ཆོས་སྟོན་ཉི་མ་མང་དུ་དྭངས་པ་དང་། རྒྱལ་པོ་ལ་ཆོས་དང་མཐུན་པའི་སྨོན་ལམ་བཏབ་ནས་སོང་བས། ཡང་ཡང་ཆོས་སྟོན་ལ་སྤྱན་དྲངས་སོ། །དུས་རེ་ཤིག་གི་ཚེ་རྒྱལ་པོས་ལོ་རྒྱུས་ཞིབ་ཏུ་དྲིས་ཏེ་ཞུས་པ་ལས། ང་ནི་ཕ་དང་མ་བྲལ་བའི། །བྲམ་ཟེའི་རིགས་ཀྱི་ཏེ་ལོ་ཡིན། །ང་ལ་མཁན་སློབ་ཡོད་མེད་དེ། །ང་ནི་རང་བྱུང་སངས་རྒྱས་ཡིན། །ངས་ནི་ཤེས་ཉེན་མ་བསླབས་ཏེ། །སྒྲ་ཚད་རིག་པ་རང་རྡོལ་ཡིན། །བདེ་མཆོག་སྐུ་གསུང་ཐུགས་དང་ནི། །ང་ནི་དབྱེར་མེད་བརྗོད་དུ་མེད། །ཅེས་པས་འདིའི་དུས་སུ་བདེ་མཆོག་འཁོར་ལོ་དངོས་སུ་གྲགས་སོ། །
༄། །དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོར་བསྡུས་ཏེ་བསྟན་པའི་ཡོན་ཏན།
དུས་རེ་ཤིག་ན་རྒྱལ་པོ་མེ་ཏོག་གླིང་ལ་ཞེས་བྱ་བ་དེ་སློབ་དཔོན་ལ་དད་ནས་མོས་གུས་བྱས་ཤིང་གསོལ་བ་བཏབ་པས། རྗེ་ཏེ་ལོ་པས་ཀྱང་རྗེས་སུ་བཟུང་སྟེ། པཎ་ཌི་ཏ་(པཎྜི་ཏ་)དང་ཀུ་སུ་ལུ་མང་པོ་དང་དུས་གཅིག་དུ་(ཏུ་)ཚོགས་འཁོར་གྱིས་གཙོ་བོ་ཞུས་ནས་གསོལ་བ་བཏབ་པས། དཀྱིལ་
1-1-64b
འཁོར་སྣ་ཚོགས་ཀྱི་ཏིང་ངེ་འཛིན་ལ་སྙོམས་པར་བཞུགས་པས། གང་ཟག་དེ་རྣམས་ཀྱིས་དཀྱིལ་འཁོར་ཐ་དད་པའི་སྣང་བ་བྱུང་། མི་མཐུན་པ་ལ། ངའི་ལུས་ནི་ཀྱེའི་རྡོ་རྗེ་ལ། །ངག་ནི་མ་ཧཱ་མ་ཡ་ཡིན། །སེམས་ནི་བདེ་མཆོག་འཁོར་ལོ་སྟེ། །དབང་པོ་གསང་བ་འདུས་པ་ཡིན། །ཡན་ལག་སྒྲ་རྒྱུད་ནག་པོ་ཡིན། །ཉིན་ལག་རྡོ་རྗེ་འཛིན་བྱེད་ཡིན། །རྩ་གནས་རྡོ་རྗེ་གདན་བཞི་ལ། །རླུང་གནས་རྡོ་རྗེ་འཕྲེང་བ་ཡིན། །ཐིག་ལེ་གསང་བ་མཛོད་ཡིན་ཏེ། །གཙུག་ཏོར་སངས་རྒྱས་ཐོད་པ་ཡིན། །ཐམས་ཅད་བདག་ཉིད་དུས་འཁོར་ཡིན། །བདེ་མཆོག་སངས་རྒྱས་མཉམ་པར་སྦྱོར། །རང་སེམས་ལྷན་ཅིག་སྐྱེས་པ་ཉིད། །སྐད་ཅིག་དང་པོ་རང་བྱུང་བས། །མ་སྐྱེས་འདས་པའི་སངས་རྒྱས་ཡིན། །སྐད་ཅིག་གཉིས་པ་འགག་པ་མེད། །མ་སྐྱེས་མ་བྱོན་སངས་རྒྱས་ཡིན། །སྐད་ཅིག་གསུམ་པ་ལྷུན་གྱིས་གྲུབ། །སྐྱེ་མེད་དེ་ལྟར་སངས་རྒྱས་ཡིན། །བ་སྤུ་ཞིང་ཁམས་དཔག་མེད་ཀྱི། །དེ་དག་དུས་གསུམ་སངས་རྒྱས་ཀྱིས། །སྐུ་གསུང་ཐུགས་དང་དབྱེར་མེད་ཡིན། །ཞེས་གསུངས་ཏེ། གཙུག་གི་ནོར་བུའི་དགོན་པར་གཤེགས་པ་ལས། རྣལ་འབྱོར་པ་དེ་རྣམས་ཐམས་ཅད་ཀྱིས། དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོ་ཡིན་པར་འདུག་ཞེས་གྲགས་སོ། །དེ་ནི་དུས་གསུམ་གྱི་སངས་རྒྱས་ཐམས་ཅད་ཀྱི་ངོ་བོར་བསྡུས་ཏེ་བསྟན་པའི་ཡོན་ཏན་བསྟན་པའོ། །སངས་རྒྱས་དངོས་ཀྱི་སྤྲུལ་པ་འགྲོ་བའི་མགོན། །སྒྲོལ་མས་བྱིན་བརླབས་མིང་ནི་ཏེ་ལོ་པ། །ཤེས་རབ་ལྔ་ལྡན་ཤེས་རབ་བཟང་པོ་ཞེས། །གསང་བའི་མཚན་ནི་བདེ་ཆེན་རྡོ་རྗེ་དང་། །རྟོག་མེད་རྡོ་རྗེ་བདེ་བའི་འཁོར་ལོ་ཞེས། །ཀ་ལ་བྷ་ཞེས་གྲགས་པའི་བླ་མ་ནི། །ཏིལ་གྱི་ཞབས་ཞེས་གྲགས་པ་འཆི་མེད་སྐུ། །རྗེ་ཏེ་ལོ་རྣལ་འབྱོར་དབང་ཕྱུག་དེའི་ཞབས་ལ་
1-1-65a
འདུད། །རྗེ་ཏེ་ལོ་པའི་རྣམ་ཐར་རྫོགསྷོ།། །།
